Rev 18 | MPX | STEP | Sauga anelose wana baaba i pwamowasi, inoke anelose etegana al ya kite i loem labulabumwa. Logugui gasigasisena i minaa elana, ge wana wasawasa mwananalina panayawi i yane.

1 Sauga anelose wana baaba i pwamowasi, inoke anelose etegana al ya kite i loem labulabumwa. Logugui gasigasisena i minaa elana, ge wana wasawasa mwananalina panayawi i yane. 2 Inoke i yoga anana i bwata hot i ba, “Babiloni, panuwa alana bwabwatana, iyaka i samwalekaleka, iyaka i samwalekaleka! Iyaka i tabwa yayaluwa bibikel wali panuwa, ge bwasumu wali pagan nanakil bolo hi youyou wali abamina. ^a 3 Kaiwena wana ganawal paganina i ola oine gasigasisena gamagalau gegewel hi im ge i apanakil. Panayawi ana kin ona aloliya ganawal paganina hi awaawaginol, ge tolobisnes wali gogomwau i bwata hi pwawa, kaiwena bugubugul ali awa waiwaisal i viyeyaagil.”

4 Inoke anan etegana al ya hago i loem labulabumwa i ba:

“Komiu no gamagalau, panuwa ei ku tagil luwai!
Bahi wana gegi paganina nuku aahe,
inoke bahi ana lahi etega ni nonowa eliyamiu. ^b
5 Kaiwena wana gegi
pwatana i pate i na i tupa labulabumwa,
ge wana pagan nanakil
Yehoba i nuwahikan ya, abwe ni lahe. ^c
6 Tolohaveyan komiu, wana
ginol gamagalau elal nuku ginol lahe eliyana.
Hauna toto i ginol, molana nuku lahe pwatanaa al.
Iya oine gasigasisena i pek gamagalau hi im,
inoke oine gasigasisena hot
nuku hol ge nuku pek ni im. ^d
7 Totona alana i teli heyan,
ge i miminaa abamina waiwaisana elana,
he lahena nuku
papalomwani nabiyan ge ni kahikahin.
Totona i ba,
‘Nau kuin ya misiyowa
no abamisiyo wawasana elana,
nau nige abuabul i oola,
ge nige sauga etega na
kahikahin ni oola abuabul wali pagan.’ ^e
8 Toto o kaiwena, he inoke lan etega gamwanaa
abwe ana logabola nihi masal, ololana
kasiyebwa, kahikahin ge galebu bwabwatana.
Inoke iya ni kalas ginaha eliyana,
kaiwena Yehoba Yabowaine,
toto ana lahi i ginol, iya Togasisi Hot.” ^f
9 Panayawi ana kin ona, bolo avaliya hi miminaa abamina waiwaisana elana ge ganawal paganina hi awaawaginol, wana kalas kasona nihi kite, inoke baena nihi kahin nabi. ^g 10 Nihi lovakun eba wana lomwan heliya al nihi pwawa, yaka nihi talmililek laha hot ge nihi ba, “Eeu nak geb! Eeu nak geb! Babiloni, panuwa alana bwabwatana ge panuwa gasigasisena, sauga kaukaubwana hot gamwanaa am lahi iyaka i vin.”

11 Tolobisnes panayawiya heliya al ge Babiloni baena nihi kahin nabi, kaiwena iyaka nige gamagal etega wali gogomwau ni pwapwamola. ^h 12 Wali gogomwau hi paliagil i ola hiwe: gold, silba, pat ali awa waiwaisal ge kepu; kaliko waiwaisana, kaliko matana pepol, silk ge kaliko matana keketina; abwakil bwalena waiwaisana, bugubugul bolo elepent ana sala elana hi ginoliya, bugubugul bolo abwakil molana bwabwatana elana hi ginoliya, bolo kopa elana hi ginoliya, bolo aiyan elana hi ginoliya ge bolo pat ana awa lelemwana elana hi ginoliya; ⁱ 13 sinamon, enonu bwalena waiwaisana, enonu meya ge plenkinsens; oine ge olibe enonona; witi ge pwalawa; bulumakau, sipi, hosi ge waga momomol; ge gamagalau totuwalali loloyowanil. 14 Tolobisnes nihi baek elana nihi ba, “Wasawasa buguliliyau, bolo u nuwanuwatu kaiweliya tage ni gan eliyam, iyaka hi yaomal haba, ge wam gogomwau ge wam wasawasa gegewena iyaka hi teli luwagiwa, nige bosowaina al nu ahe pasikalil.”

15 Tolobisnes bolo hi lolopalipali elana ge wali gogomwau i bwata hi pwawa, nihi lovakun eba wana lomwan heliya al nihi pwawa. Yaka nihi talmililek laha hot, ge nihi kahin nabi ^j 16 nihi ba, “Eeu nak geb! Eeu nak geb! Babiloni, panuwa alana bwabwatana, valila kaliko waiwaisana, kaliko matana pepol ge matana keketina u galoi, ge tuwam ana isela gold, pat ali awa namanamalina, ge kepu molaliya bwabwatana. ^k 17 He sauga kaukaubwana hot gamwanaa am lahi i vin, inoke wam wasawasa buguliliyau bolo o hi yaomal haba.”

Waga ali toyabyab gegewel, avaliyau ge bolo hi gaiha wagaa, waga ana totuwalali, ge bolo wali mani ana abanem hoga ana tuwalali elana, nihi talmililek laha hot. ^l 18 Wana kalas kasona nihi kite, inoke nihi yoga nabi nihi ba, “Tab sauga etega panuwa etega i ola panuwa alana bwabwatana e?” ^m 19 Yaka papakova nihi yoho heheyan kokowaliyaa ge nihi kahin nabinabi nihi ba, “Eeu nak geb! Eeu nak geb! Babiloni, panuwa alana bwabwatana, tonwaga gegewel wali gogomwau i bwata hi pwawaa wam wasawasa elana. He sauga kaukaubwana hot gamwanaa wam gogomwau gegewena hi yaomal haba!”

20 Komiu tomilabulabum, ku yaliyaya!
Komiu Yehoba wana gamagalau, alomiyau
apostolowau ge palopitau, ku yaliyaya,
kaiwena nak toto Babiloni i ginol eliyamiu, lahena
Yehoba iyaka i ginol pasikal elana. ⁿ
21 Yaka anelose gasigasisena etega pat bwabwatana i ola pwalawa ana ewowowol i ahe i alihinek hogaa, ge i ba:

Babiloni, panuwa alana
bwabwatana, abwe nihi alipalowa ni ola to,
ge nige al gamagalau nihi kikitewa. ^o
22 Nige al egalagalavenu ololana hapi, igo ge
bwagigi analiya ni gagan eliyam.
Bolo wali aatena gaganina tuwalali tomaha ge
tomaha kaiweliya, nige al nihi miminaa eliyam.
Pwalawa ana abawowowol butuna nige al
gamagalau nihi hahagowa eliyam. ^p
23 Odam mwananalina nige al ni yayana eliyam,
ge toalolon melutauina alona ana kawakawalolu,
analiya nige al gamagalau nihi hahagowa eliyam.
Am lahi ni ola to, kaiwena valila wam tolobisnes
alaliya hi pwabwata panayawiya,
ge wam kukula eliyana
gamagalau gegewel panayawiya u kakawel. ^q
24 Yehoba ni lahewa, kaiwena wana palopitau ge wana gamagalau u tagapaaligal,
totapwalolo gegewel
panayawiya ali taulol ana lahi ni nowa eliyam. ^r